ජීවිතේ සුන්දරද? මෙතරම්!

මම සම්පුර්ණයෙන්ම සෘණාත්මකව සිතන කෙනෙක් ද කියා මම හරියටම නොදනිමි. මා එසේ සිතන්නෙක් ය කියා මගේ සමහර මිතුරන් වරකට වඩා මා හට කියා තිබේ. සමහර විට ඔවුන් කියනා දේ සත්‍යය වන්නටත් පුළුවන.

මම සැබවින්ම සෘණාත්මකව සිතන්නෙක් වුනත් මට එය ගැටළුවක් නොවේ. ඒ, මට සෘණාත්මක චින්තනයෙන් ඈත් වීමටවත් මම ධනාත්මක චින්තකයෙකු බව අනෙක් අයට හෝ මටම ඔප්පු කරවාගන්නවත් උවමනාවක් නොමැති හෙයිනි.

මගේ චින්තනය ධනාත්මකද, සෘණාත්මකද නැත්නම් වෙන යම් මොකක් හෝ එකක් ද කියා එයට ගැලපෙන ලේබලය ගැන මම මොහොතකටවත් වද නොවෙමි. මම උත්සාහ කරන්නේ මා ජීවත් වන ලෝකයේ යථා ස්වභාවය නොබියව බාර ගැනීමට හා එය හැකි පමණින් තේරුම් ගැනීමටයි. බුද්ධිමය වශයෙන් මගේ අරමුණ එයයි. මා ජීවත් වන යථාර්තය සෘණාත්මක නම්, අනිවාර්‍යයෙන්ම මගේ චින්තනයද සෘණාත්මක වීම වැළැක්විය හැකි නොවේ.


අතහැර දමනු ලැබූ නිවසක ජරාවට ගිය නාන කාමරයක මිනිසුන් කිහිපදෙනෙකු සිරවී සිටියි. තැනින් තැන වැටී සිටින ඔවුන්ගේ කකුල් නාන කාමරයේ එක් එක් උපාංග වලට දම්වැල් දමා ගැටගසා තිබේ. කිසිවෙකුට සොයා ගත නොහැකි ලෙස සිර කර තිබෙන මොවුන්ට යන්තම් ජීවත් වීමට හැකි පමණට ආහාර ලබා දේ. මොවුන්ට කිසිදා ගැලවෙන්නට නොහැක. එකම ගැලවීම යම් දිනක සිදුවන්නට නියමිත මරණය පමණි. (SAW නම් චිත්‍රපටයේ නානකාමරය සිහියට නංවා ගන්න. එතැන් සිට මගේ උදාහරණයේ තොරතුරු ඒ තුළ නිර්මාණය කරගන්න උත්සාහ කරන්න)

ඔවුන් හසුවී තිබෙන උගුලෙන් මරණය හරහා නිදහස ලැබෙන දිනය එනතුරු සිරකරුවන් ලෙස සිය ජීවිත ගත කරනට සිදුව තිබෙන ඒ මිනිසුන් කිහිප දෙනාට, සිය චින්තනය හැඩගස්වා ගත හැක්කේ කෙසේද?

එහිදී තමන්ගේ සිහි විකල් නොවී සිටීමට හැකි පමණින් එක් එක් ක්‍රියාවල නියැලීමත්, එකිනෙකා අතර වාචිකව හෝ හැකි පමණකින් සහසම්න්ධතා ඇති කරගැනීමත් වැදගත් වේ ය යන්න අවිවාදිත ය. තමන්ගේ සිරකුටිය තුළ (නානකාමරය තුළ) ඇති මොනවා හෝ සොයාගෙන කාලය ගත කර ගැනීමේ අරමුණින් යම් යම් ක්‍රීඩා නිර්මාණය කර ගත හැකිය. තමන්ගේ අනන්‍යතා අනුව එක් එක් අය අතර සමීප මිතුරු හෝ හැකි නම් ආදර සබඳතා ඇති කරගත හැකිය. ගතවන කාලය තුළ ළඟාකරගත හැකි හොඳම යහපැවැත්ම උදෙසා යම් යම් සම්මුතීන්, එකඟතා වලට එළඹිය හැකිය. ලැබෙන කෑම ප්‍රමාණයන් අවශ්‍යයතාවය අනුව බෙදාගන්නා අයුරු ගැන සාකච්ඡා වාද විවාද කල හැකිය. හැකි තරම් පිරිසිදුව, සෞඛ්‍යයාරක්ෂිතව සිටීමේ වැදගත්කම අවබෝධ කරගෙන ඒ වෙනුවෙන් හැකි ක්‍රියාමාර්ග ගත හැකිය.

මේ සියල්ලම වැදගත් මෙන්ම ඉතාම තාර්කික ක්‍රියාය.

එසේ නැතුව, තමන් හසුවී සිටින අභාග්‍යය සම්පන්න ඉරණම ගැන මැසිවිලි නඟමින් ඔහේ නාහෙන් අඬ අඬ කල් ගත කිරීමෙන් කිසිදු පලක් නොවන බව පැහැදිලිවම පිළිගත හැකි කාරණයකි.

මේ කාරණා, සටහන කියවන ඔබටද මටද අවිවාදයෙන් පිළිගත හැකි බව උපකල්පනය කරමි. කිසිදු ගැටළුවක් නැත.

මිනිසුන් කිහිපදෙනා පත් වී සිටින, ගැලවිය නොහැකි අභාග්‍යය සම්පන්න ඉරණම නිසා යම් ආකාරයක, ධනාත්මක චින්තනයක් ප්‍රයෝජනවත් වන බව මම අවිවාදයෙන් පිළිගනිමි. එහෙත් ඔවුන් ඉන්නා ඒ තත්වයේ සැබෑ ස්වරූපය තේරුම් ගැනීමට එය බාධාවක් කර නොගත යුතු බවයි, මා ඉදිරිපත් කරන තර්කය.

ගැලවීමක් නැති වන ලෙස මරණයෙන් පමණක් නිදහස් වන දිනයක් එන තෙක් සිර වී සිටීමට සිදුව තිබෙන ඔවුන්ට ධනාත්මක චින්තනයෙන් ප්‍රයෝජනයක් තිබෙන බව පිළිගත හැකි වුවත් ඔවුන් ඉන්නා ඒ තත්වය (ඔවුන් මුහුණ දී ඇති situation එක) ධනාත්මක, හොඳ තත්වයකැයි තර්ක කිරීම ඔවුන්ගේ ජීවිත වල යථා ස්වභාවය දරුණු ලෙස පටලවා ගැනීමක් නොවේද?

පැහැදිලිවම පෙනෙන්නට තිබෙන ඔවුන්ගේ ජීවිත වල සැබෑ තත්වය සෘණාත්මක බව යමෙක් පිළිගැනීම ගැටළුවක් වන්නේ මොන අර්ථයෙන්ද?

ඒ නානකාමරය තුළ දම්වැල් වලින් දෙපය සිර වී මීටර් කිහිපයක් පමණක් එහෙ මෙහෙ යාමට හැකි ඉඩක් තුළ, මිනිස් සබඳතා ගොඬනඟා ගැනීමේ යම් ප්‍රයෝජ්‍යය වටිනාකමක් තිබුන පළියට, ඒ සිරගෙය තුළ දුක් විඳීමට එහිදී එකිනෙකා සංසර්ගය කර තවත් මිනිසුන් බිහි කිරීම සදාචාරාත්මක අර්ථයෙන් සාධා‍රණීයකරණය කල හැකිද?

“අපිට ටයිල් කෑලි වලින් මීටර් තුන හතරෙ බට්ටො පැනල කම්මැලියි. එපා වෙනව අප්පා. පොඩි එකෙක්වත් හිටිය නම් බෝනික්කෙක් වගේ හුරතල් කර කර ඉන්න තිබ්බා. අපේ පැවැත්මට එහෙනම් තාවකාලිකව හරි යම් අරමුණක් ලැබෙනවා. පොඩි එකා කවද හරි ලොකු වෙලා මේ ටයිල් කෑලි වලින් බිත්ති හූරලා ලස්සන චිත්‍ර අඳියි..”

මේ තර්කනය ධනාත්මක චින්තනයද? මෙහි අවුලක් ඇති බව දැකීම සෘණාත්මක චින්තනයද?

දැන්, මා යෝජනා කල උපකල්පිත යථාර්තයෙන් එළියට පැමිණ ඔබ මම ජීවත් වන සැබෑ ලෝකයට එමු.


මගේ උපකල්පිත යථාර්තය සහ අපේ සැබෑ ලොවේ සෑහෙන විශාල වෙනස්කම් තිබෙන බව අමුතුවෙන් කිව යුතු නැත. එහෙත් ඔබ උත්සාහ කලහොත්, ඔබ සිතනවාට වඩා සමානකම් ද දැකිය හැකි බව යෝජනා කරන්නට කැමැත්තෙමි. නිකමට මෙන් සිතා බලන්න. ඒ සිතා බැලීමේ කාර්‍යයේදී නිකමට මෙන් අවංක වෙන්නද උත්සාහ කරන්න.

යම් අවස්ථා වල – ඉහත මගේ උදාහරණයේදී මෙන් – සෘණාත්මක චින්තනයෙන් මිනිස් යහපැවැත්මට බාධාවක් වන බව පැහැදිළිය.

එහෙත් යම් සන්ධර්භයකට අදාලව යථාර්තයේ අවංක නිරූපනයම සෘණාත්මක නම්, ඒ චින්තනය පැහැදිලි කිරීමට වඩාත් සුදුසු වචනය වෙන්නේ ‘සෘණාත්මක’ බව නොව ‘යථාර්තවාදී’ බව (realist) නොවේද?

ජෝර්ජ් ඕවෙල්ගේ 1984 ලෝකය සෘණාත්මක බව කීම අවුල් ද? හක්ස්ලිගේ Brave New World හි ලෝකය සෘණාත්මක බව කීම වැරදිද? මාග්‍රට් ඇට්වුඩ්ගේ Handmaids Tale ලෝකයට ගැහැණු දරුවෙක් බිහි කිරීම සදාචාරාත්මකව වැරදි බව කීම හෙණම අප්සට් ද?

යම් ජීවීන් පිරිසක් ජීවත් වන ලෝකය සෘණාත්මක නම් එය සෘණාත්මක බව කීම මහා අප්සට් එකක් නොවේ. එය යථාර්තවාදී වීමකි.


මගේ ආකල්ප පදනම් වෙන්නේ ඕවෙල් ගේ 1984 මෙන් අප ජීවත් වන ලෝකය සහ අපේ ජීවිත සැබවින්ම සෘණාත්මක ය කියන උපකල්පනය මත බව මම පිළිගනිමි.

අපගේ යථාර්තය සෘණාත්මකය කියා මා කියන්නේ ඇයි?

ඊළඟ සටහනින් මම ඒ ගැන ලියන්නට අදහස් කරමි.
.
.
.
— ජේමිස් බණ්ඩා

#antinatalismlk

ප්‍රතිචාර සඳහා:

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s